企業強人丨龔嘉欣1分鐘密集式背資料場口1 take搞掂 大方分享「自言自語」增強記憶力大法

由騰訊視頻和TVB聯合製作的台慶劇《企業強人》，今晚（18日）八點半翡翠台播映大結局。結局周最後數集劇情，除集中顯示方芳（龔嘉欣飾）升呢世代物業主席後的蛻變及成長外，宋翹（張曦雯飾）能否克服復發的癌症、及徐道明（譚俊彥飾）能否如願抱得美人歸亦是焦點所在。

宋翹生死自然是今晚大結局的焦點，而大結局另一焦點場口則落在另一名女主角龔嘉欣（Katy）身上；今晚Katy將在一鏡過的拍攝情況下、一口氣背誦出長達整整一分鐘的「資訊式台辭」，當中除包含大量翹口的公司名字外，還涉及不少數字，絕對是記憶力大考驗；不過Katy最終仍順利一take過完成考驗，相當厲害。原來Katy有個不為人知的習慣，就是會在拍攝重頭場口前，不斷自言自語自我催眠，務求以類似吸引力法則的方法幫助自己極速進入狀態：「我會成同自己講嘢，『呢場戲要做好啲，我得一次機會！』，雖然拍劇有得NG同剪接，但我成日覺得第一次會係最真實嘅感覺，同埋我都唔會想對手失望，講兩句又NG。」談到與老戲骨John哥（姜大衞）對手戲連場，Katy坦言勁大壓力，並笑言不敢直視對方：「因為一來我啲對白好多專業詞語，你又知John哥加埋個造型坐喺度幾有氣勢，我直頭唔敢望佢。但我同我自己講我依家係方芳，我一定要贏過邢生，所以係好有壓力。我覺得我唔會想喺呢個前輩面前NG，唔係只係對白、連個戲我都唔想NG，想要做到好精準，我覺得呢個係健康嘅壓力，係好嘅推動力。」